Provas de acesso à FP

Vêm de ser convocadas as provas de acesso aos ciclos de FP para aquelas pessoas que carecem da titulaçom correspondente que permite o acesso direto (título de graduado em secundária para a FP de grau médio e título de bacharelato para a FP de grau superior). Para a inscriçom nas provas de grau médio é necessário ter cumpridos dez e sete anos no presente ano, enquanto para as provas de grau superior os requisitos de idade situam-se em dez e nove anos, ou também dez e oito no caso de a pessoa possuir um título de técnico de FP dumha família profissional incluída na via escolhida para realizar as provas.

A estrutura e organizaçom destas provas, os tipos de exames e as suas características podem consultar-se na nota informativa publicada pola conselharia de educaçom. Para as provas do grau superior o prazo de inscriçom abrange do 23 de janeiro ao 3 de fevereiro e os exames celebrarám-se o 30 de março. Pola sua parte, o prazo de inscriçom para as provas de grau médio abrangem do 27 de fevereiro ao 9 de março e os exames celebrarám-se o 25 de maio.  Mais info no sítio web da FP da conselharia de educaçom.

Provas de acesso à universidade para maiores de 25 anos

Nos primeiros dias do próximo mês de março vam ter lugar as provas de acesso à universidade para maiores de 25 anos. Na presente ediçom poderám concorrer as pessoas com 25 anos cumpridos antes do 1 de outubro do 2012 que nom possuírem o título de bacharelato ou equivalente.
Estas provas estruturam-se em duas fases. A fase geral compreende quatro exames: comentário ou desenvolvimento dum tema geral de atualidade, língua castelhana, língua galega e língua estrangeira. A fase específica compreende três exames, dous obrigados e um optativo, que variam segundo a opçom elegida. Existem cinco opçons que se correspondem com as cinco ramas do conhecimento que atualmente organizam as titulaçons universitárias: A) artes e humanidades; B) ciências; C) ciências da saúde; D) ciências sociais e jurídicas; E) engenharia e arquitetura. Mais informaçom na web da Comissom Interuniversitária Galega (CIUG).
O prazo de matrícula abrange do 23 de janeiro ao 17 de fevereiro e as provas realizarám-se os sábados 3 e 10 de março na Faculdade de Direito da Universidade de Santiago.

"Notas de corte" 2011

No sítio web da CIUG (Comissom Interuniversitária Galega) já estám disponíveis para consulta as qualificaçons definitivas que definírom a admissom nas titulaçons com límite de praças ("notas de corte") neste ano 2011. Para umha correta interpretaçom das mesmas convém lembrar que, desde a implantaçom do novo sistema de acesso no ano 2010, a qualificaçom máxima situa-se agora em 14,00 pontos em vez dos 10,00 pontos do anterior sistema.
Assim observamos que na Universidade de Vigo as notas de corte mais altas correspondem às titulaçons "Traduçom e Interpretaçom Espanhol-Inglês" (10,492) e "Engenharia da Energia" (10,036); na Universidade de Santiago som "Medicina" (11,598) e "Odontologia" (11,018), enquanto na Universidade da Corunha resultam "Fisioterapia" (9,438) e "Enfermaria" (9,390).
Ainda que a tendência dos últimos tempos nas três universidades é limitar as praças na maioria das titulaçons podemos agora constatar que em muitos casos a demanda apenas ultrapassa o número de praças convocadas ou mesmo ficam praças sem cobrir. Isto é o que acontece em mais de vinte titulaçons que mostram umha nota de corte entre 5,000 e 5,100 especialmente se ademais o processo se prolongou até setembro. Assim podemos reparar por exemplo em "Administraçom e Direçom de Empresas" e "Belas Artes" (Universidade de Vigo), "Filosofia" e "Física" (Universidade de Santiago), "Ciências Empresariais" e "Engenharia Informática" (Universidade da Corunha).
Toda a informaçom sobre provas de acesso e procedimentos de admissom nas universidades galegas está no sítio web da CIUG.

F.P.: distribuiçom 2011-12

A informaçom atualizada sobre todos os estudos da formaçom profissional (FP) oficial está disponível no sítio web da conselharia de educaçom e permite diversas formas de consulta.

- Folhetos informativos das 22 famílias profissionais com descriçons, para cada ciclo, dos correspondentes perfis profissionais e os módulos formativos do programa de estudos.

- Listados da distribuiçom atual de todos os ciclos do regímen ordinário da FP classificados por famílias profissionais ou classificados por concelhos.

- Listados da distribuiçom dos ciclos com oferta modular (parcial) para pessoas adultas classificados por famílias profissionais ou classificados por concelhos.

- Listado dos centros e ciclos que oferecem estudos de FP a distância (esta fórmula está ainda pouco desenvolvida).

A ideologia ultraliberal na educaçom pública: mais alarmas

Nos últimos meses temos recebido notícias sobre umha fundaçom privada denominada "Empieza por Educar" e os seus movimentos em Madrid arredor da educaçom secundária pública, mas agora já circulam rumores sobre a sua próxima expansom no âmbito galego. É bom momento para recolher e atualizar dados a partir dum informe elaborado polo portal Fírgoa no mês de julho.

A fundaçom Empieza por Educar é a sucursal em Espanha da seta ultraliberal Teach for America, que se estende por todo o mundo sob a denominaçom Teach for All, e que também este mesmo ano tem apresentado Ensina!, a sucursal correspondente no Brasil. O seu propósito é infiltrar-se nos centros de educaçom públicos com "missionários da causa", substituindo progressivamente os professores funcionários públicos e divulgando e promovendo a ideologia do livre mercado na educaçom. A estratégia parte da captaçom de graduados universitários e o seu posterior doutrinamento mediante um cursinho de cinco semanas de duraçom (que denominam Instituto de Verão), que presuntivamente os capacita para atuar a todos os efeitos como professores. Depois do cursinho, e com a cumplicidade das administraçons públicas implicadas, os prosélitos penetram nos centros educativos, nos que deverám permanecer dous anos.

Teach for America está apadrinhada por umha amplíssima coligaçom de empresas e fundaçons, entre as que destacam The Walton Family Foundation, da cadeia de supermercados Wal-Mart, Bill & Melinda Gates Foundation, vinculada a Microsoft, Michael & Susan Dell Foundation, de Dell Inc., etc. A presidenta do Padroado de Empieza por Educar é Ana Patricia Botín, filha do presidente do Banco Santander, e os membros do padroado som Carlos Barrabés, Sol Daurella, Olaf Díaz-Pintado, e mais ... Entre os socios encontram-se Fundación Marcelino Botín, Fundación Ramón Areces, Fundación la Caixa, Uría Menéndez-Proença de Carvalho, Deloitte, Deutsche Post – DHL, Fundación Barclays, McKinsey & Company, Job and Talent , Fundación CYD, Trackglobe e Llorente y Cuenca.

A fundaçom apresentou-se em fevereiro de 2011 contando com a participaçom do Diretor Geral de Universidades Màrius Rubiralta e a Conselheira de Educaçom do governo madrileno de Esperanza Aguirre, Lucía Figar. Pouco antes da sua apresentaçom, o Ministério de Educaçom assinou um convénio de colaboraçom polo que se dava entrada a Empieza por Educar no programa Campus de Excelência Internacional. Em Madrid a fundaçom tinha previsto começar as suas atividades neste curso 2011/12 através do programa "Refuerza" regulado na Ordem 1556/2011, de 18 de abril. Esta convocatória confere aos diretores dos centros educativos a capacidade para contratar com terceiros a organizaçom e realizaçom das atividades vinculadas ao programa Refuerza até um 100% do custe, deixando nas mãos da iniciativa privada todo o programa, ao tempo que obriga aos departamentos didáticos, aos professores tutores e ao departamento de orientaçom a coordenar-se com os monitores e/ou professores encarregados destas atividades extraescolares (!). Afortunadamente a mobilizaçom do professorado tem paralisado até agora esta infiltraçom, mas a diversas plataformas em defessa do ensino público ali continuam alerta ... E aqui?

Josep Fontana: "Ensino público e democracia"

Em um artigo sobre a loucura das políticas de austeridade que em vez de resolver a crise o que elas fazem é a perpetuar, Paul Krugman assinalava que a maior parte dos recortes nos investimentos públicos cai sobre a educaçom, embora "deixar desempregados a milhares de professores nom parece a melhor maneira de conquistar o futuro".

O pior é que esses recortes som apresentados como uma medida temporária, como uma consequência necessária da crise e superada esta tudo será como antes, quando na verdade existem motivos razoáveis ​​para suspeitar que se trata de tirar partido da crise para fazer uma "reforma educacional" em que apenas vai permanecer como gratuito o ensino destinado a formar peonagem, enquanto o ensino superior será reservado para quem poder satisfazer os custos elevados que haverám de exigir as universidades que, por seu lado, receberám cada vez menos recursos públicos.

[ Vínculo para o artigo original completo no diário Público. ]

S.O.S. : Ensino público

Eis alguns exemplos das açons em defesa do ensino público que se estám a desenvolver no âmbito galego e também em diversos contextos próximos e distantes.

- Crónica da segunda grande manifestaçom e primeira greve do ensino público no início das aulas na Galiza.

- Segunda greve na Galiza no mês de setembro e mais informaçom da perspetiva sindical.

- Recentes declaraçons de Mário Nogueira, secretário geral da Fenprof (Federação Nacional dos Professores de Portugal), nas que salienta o emprego e a estabilidade como principais motivos da luta dos professores nestes momentos de grande ataque à educaçom.

- Novas convocatórias de greve em Madrid para o mês de outubro, trás os protestos realizados polo professorado em setembro.
- Reportagem da greve geral dos professores no estado brasileiro de Minas Gerais, que durante mais de três meses resistem intransigência do governo.
-Notícias da demonstraçom de força dos estudantes chilenos na luta pola educaçom pública.