segunda-feira, 31 de março de 2008

Orientar-se ... em abril!

O processo de toma de decisons vocacionais entra agora na fase definitiva para muitos estudantes e nom é casual que no mês de abril se concentrem diversas actividades dedicadas a informar, asessorar e apoiar o alunado neste processo. Entre elas destacamos três: as XVII Jornadas de Orientaçom Universitária e Profissional, o ForumOrienta08 e Aula 2008, salom internacional do estudante.
As XVII Jornadas de Orientaçom Universitária e Profissional desenvolvenm-se na Corunha entre o 31 de março e o 16 de abril, organizadas polo Centro Municipal de Informaçom Juvenil (CMIJ) e polo Serviço de Asessoramento e Promoçom do Estudante (SAPE) da Universidade da Corunha. Na primeira semana tenhem lugar mesas informativas sobre os estudos universitários com participaçom de professorado, alunado e profissionais. Na segunda semana realizam-se as visitas à sede da UNED e a todos os centros públicos (e algum privado) da Corunha que tenhem ciclos de FP e de artes plásticas. Finalmente, na terceira semana dedica-se umha jornada de mesas informativas a outros estudos profissionais e artísticos (música, desenho, turismo, ...).

O ForumOrienta08, ensino superior na galiza, desenvolve-se em Vigo entre o 8 e o 13 de abril, organizado pola Conselharia de Educaçom com a colaboraçom das três universidades galegas. Ao longo da semana haverá palestras informativas, demonstraçons, obradoiros, dinâmicas de grupo, exposiçons de materiais, ... sobre todas as modalidades dos ensinos superiores no âmbito galego, tanto universitários como nom universitários. Na primeira jornada por exemplo estám previstas sessons sobre as provas de acesso à universidade, palestras sobre algumhas titulaçons próprias de determinadas universidades, demonstraçons de química, energia solar, jazz e percussom, câmbio climático, robótica, arqueologia, informática, video e fotografia, e muitas outras. Segundo o programa, o ForumOrienta08 rematará na média tarde do dia 13 com um breve concerto a cargo de alunos/as do Conservatório Superior de Música da Corunha.

A ediçom 2008 de Aula-Salom internacional do estudante e da oferta educativa desenvolve-se en Madrid entre os dias 2 e 6 de abril, organizado polo Instituto Ferial de Madrid (IFEMA) com patrocínio do Ministério de Educaçom e Ciência (MEC). Este ano China é o país convidado, sendo a primeira vez que um país asiático participa nesta condiçom de convidado. Ao próprio tempo Itália terá também umha presença destacada devido ao acordo entre Aula 08 e o seu homólogo Job & Orienta da cidade de Verona. Ademais dos postos de exposiçom dos organismos públicos e das entidades privadas que participam estám previstas diversas actividades paralelas na própria sede e também visitas a museus, centros de alto rendimento, centros do CSIC, etc.

quinta-feira, 27 de março de 2008

I Jornadas de Sociologia da Educaçom

Entre os dias 26 de marzo e 17 de abril desenvolvem-se, simultaneamente na Corunha, Ferrol, Lugo, Ourense, Pontevedra, Santiago e Vigo, as primeiras Jornadas de Sociologia da Educaçom promovidas pola CIG-ensino e a AS-PG.
Através dos subtítulos Galiza no mundo, Educaçom e Sociedade, os organizadores proponhem diversos temas de tipo linguístico, histórico-social, económico e político para serem analisados e desenvolvidos por dez expertos, com tempo suficiente para permitir abordagens além de tópicos e esquematismos e também para propiciar colóquio e debate entre os assistentes. No correspondente programa pode-se consultar o calendário de actividades por localidades e os nomes de todos os relatores participantes.

terça-feira, 11 de março de 2008

Aula e Forum Orienta, próximos encontros

Entre os dias 2 e 6 de abril celebrará-se en Madrid unha nova ediçom de Aula, salom internacional do estudante e da oferta educativa, que se apresenta como um foro de informaçom e orientaçom dirigido especificamente a estudantes, famílias, professorado e orientadores/as.

Pola sua parte, o Forum Orienta 08 traslada-se esta vez a Vigo onde desenvolverá as suas actividades, entre o 8 e 0 13 de abril, centradas na promoçom, achegamento e difussom da oferta de ensino superior no âmbito galego para o alunado de bacharelato e de formaçom profissional.

quinta-feira, 6 de março de 2008

Provas de acesso aos ciclos de F.P.

A via ordinária para aceder aos estudos de formaçom profissional é possuir o título correspondente: título de graduado em secundária para os ciclos de F.P. de grau médio, e título de bacharelato para os ciclos de F.P. de grau superior. Porém existe umha via extraordinária de acesso para as pessoas que nom dispõem do título: isto é posível através da superaçom de umhas provas que anualmente convoca a conselharia de educaçom. No presente ano a publicaçom da convocatória foi madrugadora (primeiros dias de janeiro).
Para os ciclos de grau superior o processo está realmente avançado com o prazo de inscriçom já rematado e com a publicaçom (na web-fp da conselharia) das sedes nas que se realizarám as provas o próximo 18 de abril em horário de manhá e tarde.
Para os ciclos de grau médio a inscriçom poderá-se fazer entre o 21 e o 30 de abril, na secretaria de qualquer centro público que ofereça ensinos de formaçom profissional, e as provas realizarám-se o 5 de junho.
Todos os detalhes relativos a estas provas podem-se consultar na web-fp da conselharia de educaçom.